另一個陽光與海灘嘅地方我想提吓嘅就係 – 沙巴!!

今次我同個 friend 第一次自由行，想自由地hea 下。又唔洗早起、唔洗趕鴨仔，更加唔洗強迫去一啲消費「景點」。自己控制自己嘅時間，幾好呀!!

因為係自由行，方便就梗係大前提啦!! 我地選咗一間好近市中心嘅酒店 – Sutera Harbour!

呢間酒店定時定侯有shuttle bus 來回市中心架。好方便!!

又有個細細嘅私人沙灘，照顧埋啲鍾意遊海水嘅住客! 好細心! 不過佢個泳池都唔細架!

酒店就係海邊，所以有無敵大海景! 晚上仲可以吹吓海風，正到暈!

下次再去沙巴嘅話，我都好想住番呢間酒店!

沙巴啲海水都好清架! (同浮羅交怡都有得比!!)  係酒店個碼頭都可以好清晰見到啲海膽。(即係啲水好乾淨!!) 可惜我唔食海膽啦!!

講到餵魚就唔及浮羅交怡咁開心啦! 因為無咁多魚游過來!

不過啲魚都係好靚，都係咁色彩繽紛!

我仲想介紹一間好好食嘅沙嗲比大家! 佢個名叫「昌悅」。好地道，好好味! 記得要飲埋佢地個拉茶，超滑!!

位置係KK Lama 附近! 好近大馬路，好易搵!!

去玩梗係唔只留響酒店啦! 有一日，我地參加咗個Local Tour去紅樹林睇長鼻猿+晚上睇營火蟲! 要坐個幾鐘頭車先去到上船地點。

一到就有個下午茶比我地食! 好精緻!

食完個下午茶先知原來要等埋其他遊客一齊先可以開船。一架船坐8至10個人。我地架船除咗我地仲有兩個韓國人，另外仲有好幾個講國語嘅人。

跟住一行幾船就出發去搵長鼻猿。最終我地都有見到，不過就係啲好遠好遠的嘅樹上面!

你地搵唔搵到佢地呀??

最後仲響紅樹林睇埋日落，真係靚到暈架!!唔信你地自己睇吓!!!

不過點都唔及入夜後所見到嘅營火蟲! 響黑暗中，有成千上萬的嘅營火蟲包圍住我! 船上所有人都睇到哇哇叫!! 可惜因為太暗，唔可以將當時嘅美景拍底比大家睇! 你地如果去沙巴，都一定要去睇呀!!

不過我仲有個提示比大家!!入紅樹林前，記得要做好防蚊準備呀!! 我仲好記得當時坐我對面個韓國女人痕到呀媽都唔認得嘅情形，慘到爆!!

沙巴呢個地方我都一定要再去!! 我仲要挑戰神山，我要上去影日出!!